Ensino de español como lingua estranxeira pola Cruz Vermella

 Ola a tod@s!

Para a miña entrada deste tema, relativo ao ensino e certificación de linguas estranxeiras de parte de diferentes institucións internacionais, quixen falarvos sobre a iniciativa da Cruz Vermella, unha serie de cursos gratuitos para persoas solicitantes de asilo/refuxio, que persoalmente atopo moi interesante, para alén de esencial.

Trátase dunha labor voluntaria de ensino de castelán para persoas migrantes que chegan ao programa de acollida e dende o primeiro momento comezan a recibir estas aulas, o cal resultará fundamental para a súa inclusión no noso territorio. Cando unha persoa chega e necesita en moitos casos reconstruir a súa vida, precisará dominar a lingua das persoas ao seu redor, non só para conseguir e desempeñar unha profesión, senón tamén para construir unha rede social de apoio á súa volta, para alén da que a Cruz Vermella ofrece dende un inicio.

Os cursos que a institución ofrece están regulados pola normativa do Ministerio de Inclusión, Seguridade Social e Migracións e pretenden ser rápidos para garantir a participación do seu estudantado en actividades de formación profesional que lles outorguen autonomía o antes posible.

Tamén é importante apuntar que a Cruz Vermella conta para estes proxectos co apoio doutras institucións especializadas nesta área como o Instituto Cervantes, para os cursos tanto para persoas adultas como para nenos e nenas.

Concretamente con respecto ao curso impartido en 2021/22 en Segovia, cuxo programa atopei buscando información xeral, podemos ver que se trata dun temario enfocado á comunicación funcional na vida diaria, con contidos relativos a: saúdos e presentacións, cidade, transportes, compras, saúde, vivenda, emprego, documentos, familia e amizades e ocio. É, por tanto, un curso centrado no máis básico da expresión, comprensión e interacción orais e escritas co obxectivo de axudar ás persoas no seu proceso de inserción nos diferentes espazos da sociedade.

Considero especialmente importante que nós, como profesionais da docencia de linguas estranxeiras que iremos ser, coñezamos este tipo de iniciativas que dependen da colaboración voluntaria e que poden mudar a vida de moitas persoas nunha situación de especial vulnerabilidade. Por iso tamén vos deixo aquí o curso que atopei de formación de voluntari@s docentes para este tipo de actividades, cuxo prazo está aberto ata o día 19 deste mes.